“Mevazor” mahalla fuqarolar yig‘inida kichik shaharcha qad rostlamoqda.

Xabaringiz bor, Qarshi tumani “Mevazor” mahalla fuqarolar yig‘inida zamonaviy ko‘p qavatli uylardan iborat kichik shaharcha qad rostlamoqda. Bu yerda so‘nggi 2 yil davomida bunyod etilgan va ayni vaqtda qurilishi davom etayotgan yangi uylarda 380 ta oila turar-joy bilan taʼminlanadi.

O‘tgan yilda mazkur mahalla fuqarolar yig‘inidagi yangi mavzeda 180 xonadondan iborat 9 ta 5 qavatli zamonaviy turar joy majmuasi foydalanishga topshirildi. Hozirda ushbu hududda yana 10 ta ko‘p qavatli turar joy binolari barpo etilmoqda. Tuman ahli uchun yana bir yaxshi yangilik sifatida turar-joy binolarida energotejamkorlikka alohida eʼtibor qaratilmoqda. Xususan, yaqinda to‘liq qurib bitkazilgan 6 dona binolarga uy xo‘jaliklarida kichik quvvatli quyosh panellarini (umumiy quvvati 50 kVtgacha) o‘rnatildi.

Taʼkidlash joizki, tumanimizda ko‘p qavatli uylar qurilishi yildan-yilga jadallik bilan o‘sib bormoqda. So‘nggi ikki yil davomida “Chaman” mahalla fuqarolar yig‘inida ham 360 oila uchun 18 ta arzon ko‘p qavatli uy-joylar qurib bitkazildi.