Viloyat nuroniylari Qarshi tumani paxta dalalarida

Bugun, Yanvar Inoyatov, Ozod Farmonov, Shuxrat Tursunov, Eson Rajabov, Shodiyor Xo‘janazarov, Botir Rahimov, Omon Xushmurodov va viloyat Kasaba uyushmasi boshlig‘i Baxtiyor Jo‘rayevdan iborat viloyatning faxriy nuroniylari paxtakorlarga ko‘maklashish, kayfiyat ulashish maqsadida tumanimizda bo‘lib, paxta yig‘im-terimi bilan shug‘ullanayotgan paxtakorlar bilan uchrashdi. Faxriy nuroniylarga tumanimiz rahbari hamrohlik qildi.

- Har bir oila uchun paxta mavsumi daromadini oshirish uchun ham juda yaxshi imkoniyat bo‘lyaptiku. Shuning uchun Sizlarni yana-da ruhlantirish uchun dalaga otlandik, - deydi faxriy nuroniylar hasharchilar bilan uchrashuvda.

Shu kuni faxriy nuroniylar dastlab tumanning Yaxshi Omonov hududida paxta yig‘im-terimi bilan shug‘ullanayotgan tumandoshlarimiz bilan suhbat qurib, sovg‘a salomlar ham ulashishdi.

Nuroniylarning tumanimizdagi tashrifi Charog‘il hududidagi "Ochiloy Zaxira" fermer xo‘jaligida davom etdi. Ushbu fermer xo‘jaligida ayni vaqtda terim mashinalari javlon urib, paxta xirmonini yaratmoqda. Ushbu fermer xo‘jaligida ham faxriylar paxtani yig‘ib-terib olishda xizmat qilayotgan hasharchilarga tuman hokimligi va Kasaba uyushmalari Federatsiyasi viloyat Kengashining esdalik sovg‘alarini yetkazishdi hamda paxta xirmoniga baraka tilashdi.